知報恩：
襁褓劬勞深似海，人生在世可思量，報答爹娘養育恩
懷胎期：
雙親養育非容易，十月懷胎受苦身
正月懷胎如露水，二月懷胎心茫茫
三月懷胎成人影，四月懷胎結成人
五月懷胎分男女，六月懷胎六根四體全
七月懷胎分七孔，八月懷胎腹肚這大奒（hai；大）
九月懷胎肚中轉，十月懷胎圓滿脫娘身
生產期：
但看懷胎十月滿，分娩一時娘親叫艱難
娘親腹肚疼親像刀割，割娘腸肚疼心肝
趕緊許神拜佛祖，互因（她們）母囝保平安
是男是女早早來出世，免得拖磨娘嬭（le）身
好男好女早出世，生著臭頭爛耳跛跤歪喙紅目鳥精阮毋纏（tinn）
孩兒生落在房內，母囝相見心頭安
孩兒落土洿洿淖（ko ko mua ），厝邊頭尾走來看
因爹看見心歡喜，慢且歡是慢且喜
衣（胞衣）是未落是臍本剸（tug剪斷），母囝性命險拍損
生囝生贏雞酒芳，生囝生輸換人四塊枋
生囝生贏雞酒芳，生囝生輸換人四片柴
孩兒生落土哮哀哀，緊叫生婆來剸臍
生婆走到繡房內，剪刀燈心土紙麻油紗仔（te a 纖維的一種）線齊款來
衣落臍剸心歡喜，拜謝天地相扶持
衣落臍剸母囝笑吻吻（bun bun笑容可掬），公媽歡喜生著查夫孫
孩兒生落土哮哮鬧，因爹聴見趕緊走來抱
孩兒生落土哮哀哀，趕緊報因外公外媽知
閹雞母掠來刣，麵線老酒正肉（瘦肉）麻油隨後來
嬰幼期：
日來食娘心頭乳，暝來啼哮攪（kiau吵）醒娘無眠
倒爿（in邊）食了換正爿，正爿食了換來攬胸前
移焦（ta）就濕娘心受，含燒抑（iah溢）冷飼囝記在心
娘今未食憶著子，衫褲未穿煩惱囝枵（iau餓）寒
父母疼囝長流水，囝孝父母樹尾搖大風
父母飼囝無論飯，囝飼父母兄弟照算頓
一歲二歲手底抱，三歲四歲食飽去佚陶（chit tho遊玩）
能言能語娘歡喜，會行會走爹娘笑微微
五歲六歲重容貌，出珠（水痘）病疼苦爹娘
求學期
七歲八歲入學堂，讀書所望報答爹娘
九歲十歲識世事，十一十二歲勤苦敖（gqu 能幹）讀書
有錢人送囝去讀書，無錢人穮（chua帶領）囝摜（kuann 提）籃仔抾（khioh撿拾）番薯
十三十四歲進秀才，金花表裡鼓吹迎轉來
功名期：
十五十六歲結完親，十七八歲福州中舉人
舉人轉來門口來徛旗，風吹旗葉龍虎相交纏，
十九二十跳龍門，龍門跳過京城中狀元
狀元做官為宰相，紫袍錦帶不離身
紫袍錦帶何處有，三寶殿前發善心
勸行教：
生男母知娘艱苦，生著查姥囝即知娘嬭叫艱難
是男是女知報本，替娘食菜拜血盆
食得三年血盆菜，報答娘親十月懷胎
血盆化作蓮池水，五色蓮花滿池開
烏鴉尚能知反哺，羊兒跪乳報答娘嬭恩
禽獸亦識知報本，豈可人子行孝心
二十四孝順為先，且說丁蘭合目蓮
丁蘭刻木孝父母，目蓮求母往西方
父母天生無異樣，心內煩惱少年亡
長大不該來忤逆，不孝父母罵爹娘
父母不親誰是親，不敬父母敬何人
父母不親誰是親，千兩黃金難買父母心
在生之時不孝順，何容死落哭鬼神
勸恁貧富莫相欺，黃泉路上總有時
世間人有錢通買命，皇帝豈無萬萬年
不信但看廉簷（ni chinn屋簷下）水，點點滴滴落地無差移
自古及今行孝義，全頭講出眾人知
奉勸男女行孝心，做人父母真艱苦
含燒抑冷養成人，父母看囝笑嗐嗐（hi hi 滿足之笑）
日後年老望囝兒，做人囝兒就行孝
毋通不孝爹合娘，罵爹罵娘大不孝，雷公摃（kong打）死大路頭
不孝父母毋是會，死去路頭被犬啮（ka啃）
不孝雙親毋是蔜（gou厲害），死去路尾放水流
孝順還生孝順子，忤逆還生不孝兒
勸兄弟
做人兄弟就和順，毋通一日食飽吵欲分
兄弟未分三頓勻，兄弟分了三日斷火燻
像阮當初聽某（boo妻）喙，日後分開攬胸吐大氣
做人查埔囝主心定，毋通暗時合某做陣睏
枕頭邊偷學歹話，吱吱嗾嗾（chi chi chu chu竊竊私語）半句毋通聽
兄弟和好共一心，家中赤土變黃金
兄弟一人二樣心，趁（賺）銀趁錢無夠買燈心
人講打處親兄弟，父母年老兄弟出錢
人講家和萬事興，家中吵鬧萬世窮
勸媳婦：
做人媳婦就行孝，毋通不教大家官（ta ke kuann公婆）
若是不孝大家官，別日死後過油山
油山過了過刀山，罰汝陽間不教大家官
勸做人：
查埔人勿學百里奚，查姥人勿學買臣妻
查埔人就學梁武帝，查姥人就學朱盤妻
人生可比採花蜂，朝朝暮暮走西東
採得百花為啥人，為啥辛苦為誰忙
有孝有情走來聽，不孝不義大步行
有孝有義走來看，不孝不義緊緊散
有孝有義天地知，不孝不義地嶽來
勿講虛空無報應，揭頭三尺有神明
天休地休人亦休，勸恁毋通結冤仇
食人半斤還八兩，冤冤相報幾時休
勸恁厝邊就做好，毋通使蛇雙面刀
若猶使蛇雙面刀，害人生死無奈何
人善人欺天不欺，巧人一步勿為痴
欺善怕惡用舌輪，後來罪報汝就知
士農工商亦就去，毋通放蕩拍損人的錢
人生在世若眠夢，死了江山換別人
三寸氣在千丹雄，一旦無常萬事休 |
|
