< 搧(sian3)最後ㄧ擺的海風 >
去成大，
去長庚，
去和信，
閣轉來成大，
台灣有名的病院強強卜互咱走了了矣!
經過醫生十外擺的檢查，先生提(theh8)著電光片仔解釋著汝的病情。
「後期的肝癌!」醫生指住(tiau5)的。
「二爿肝葉攏已經變成黑色的矣」。
「這已經有半冬較加矣哦」，醫生對我佮五叔仔按呢講。
?講?已經無法度甲汝做完全性的治療咯(lok8)，嚴重佮一刀閣攏袂使(sai2)開，含(ham5) 想卜另外閣請外科醫生開刀攏袂凍做。
「若想卜治療，只有偆(chun1)化學治療即款暫時性的控制耳耳(nia7 nia7)。」醫生講。
哇!想袂到(kau3)已經是遮呢嚴重矣!
已經做了遐呢濟的檢查，本來想講醫生敢會檢查毋對，即馬看來檢查結果煞攏相仝，咱父仔囝二個佇病院內底，真正是喊天，天不應，喊地，地不靈，實在誠無奈的。
「干礁五十幾歲，我著毋信性命已經行到夕陽時分矣!」汝安呢(ne1)講。
過幾工了後，亦著是八八節彼工，汝的性命毋願受著無尊嚴性的拖磨佮踐踏，咱辦了出院的手續。
「西醫無效，改換中醫看覓。」這是咱思考的治療方向，無辦法中的辦法。
亦是從彼工了後，咱著開始探聽，探聽治療肝癌的祕方。
去屏東，去豐原，開始服用一帖閣一帖的青草。
心理作用的款，剛(kang7)開始的時陣汝的氣色一工比一工好，但是慢慢仔汝的腹肚嘛一工比一工較大。
「看來，效果嘛是無啥外好。」我心內偷偷的想，但是毋敢承認，誰叫遮是無辦法中的辦法。
雖然事實是安呢，但是除了我以外，嘛無人敢真正講出來。逐家講出來的話攏是「汝看來氣色有較好」的安慰話，
和平常時陣，一條腸仔通到底的二姆仔嘛攏話帶保留。
汝一直想卜去?(peh4)山，一直想卜去山裡吸寡清新的芬多精，一直想卜看寡山光林色，但是因為汝猶(iau2)無些(sia1)會曉開車。我嘛恨我家己平常的時陣，毋捌咧注意啥乜(mih8)才是汝上甲意的物(mih8)件，所以著毋捌開車載汝去山頂散步抑是行踏。如今想來，煞有淡薄仔的遺憾。
毋知是袂記得? 也是本來著原那無啥乜記智?
汝是一個老成的討海人，早著是規年通(thang3)天攏底大海走闖(cong5)。
底猶毋知汝的病情的一工，我?(chua7)汝佮(kah4)媽仔和小妹去看四草的夕陽。四草海岸的夕陽，對情愛的戀人來講，是一個談情說愛的好所在，但是對汝來講，即款有盡的紅日頭景緻，是卜按怎甲佇船仔頂，看無邊四海中的大紅落日相比咧。山頂的日出對汝來講，才是夢中的寶貝，遐才是汝想卜看的。佇遮，雖然也有少寡仔夕陽無限好的詩意，但是如今看來，只是透濫一味西落日頭已黃昏的感嘆而已。
仝(kang5)款黃昏，仝(kang5)款人。
無仝款的模樣，無仝款的心情。
河堤漸漸潰爛去，溪水以車颺的速度澶(thuann7)開，汝身軀內底癌症的細胞嘛是。
救護車的咿唔聲一直響袂停，看汝恬恬仔睏底車內病床的頂頭，遮是阮細漢汝?阮來的漁塭仔，汝敢會記得，遮的南洋?(tai7)仔，是咱歸家伙仔上愛食的。
即馬我徛(khia7)佇遮，徛(khia7)佇遮陪汝的魂魄搧(sian3)最後ㄧ擺的海風。
這是汝滯佇病院的時陣最後的向望。
阿爸，汝敢也有看見咧?
[ Last edited by ciacia on 2005-9-2 at 01:25 AM ] |
|
